ក្រមរដ្ឋប្បវេណី
គន្ថីទី៥៖ កិច្ចសន្យាសំខាន់ៗ និងអំពើអនីត្យានុកូល
ជំពូកទី ១១៖ កិច្ចសន្យាក្រុមហ៊ុន
មាត្រា ៦៩៩. និយមន័យនៃកិច្ចសន្យាក្រុមហ៊ុន
កិច្ចសន្យាក្រុមហ៊ុន សំដៅទៅលើកិច្ចសន្យាបង្កើតជាក្រុមដែលគ្មានការរៀបចំលក្ខណៈជានីតិបុគ្គល ដើម្បីប្រកបកិច្ចការដោយសហការគ្នាដោយភាគីនីមួយៗធ្វើការវិនិយោគទ្រព្យធនរៀងៗខ្លួន ។
មាត្រា ៧00. ការបង្កើតកិច្ចសន្យាក្រុមហ៊ុន
១-ក្រុមហ៊ុន គឺជាក្រុមដែលបានបង្កើតដោយការសន្យា ដែលភាគីនីមួយ។វិនិយោគ ទ្រព្យធនរៀងៗខ្លួន ហើយប្រកបកិច្ចការដោយសហការគ្នា ។
២-ទ្រព្យធនដែលភាគីនីមួយៗត្រូវវិនិយោគ នៅក្នុងកិច្ចសន្យាក្រុមហ៊ុនក្រៅពីសិទ្ធិលើទ្រព្យសម្បត្តិអាចយកពលកម្មមកធ្វើជាកម្មវត្ថុបាន ។
៣-ក្នុងករណីដែលភាគី បានយកប្រាក់ធ្វើជាកម្មវត្ថុនៃការវិនិយោគទ្រព្យធនបើមានការយឺតយ៉ាវក្នុងការបង់ប្រាក់នោះ ក្រៅពីត្រូវបង់ការប្រាក់នៃការយឺតយ៉ាវ ក៏ត្រូវបង់ទៅលើការខូចខាតដែលកើតឡើងដោយសារការយឺតយ៉ាវនោះចំពោះក្រុមហ៊ុនផងដែរ ។
៤-ក្នុងករណីដែលសកម្មភាពនៃការបង្កើតក្រុមហ៊ុនរបស់ភាគីណាមួយ ក្នុងចំណោម ភាគីដែលបានព្រមព្រៀងបង្កើតក្រុមហ៊ុនក្លាយទៅជាមោឃៈ ឬត្រូវបានលុបចោលដោយ យោងតាមបញ្ញត្តិនៃផ្នែកទី ២ (វិការៈក្នុងការបង្ហាញឆន្ទៈ និងសុពលភាពនៃកិច្ចសន្យា) ជំពូកទី ២ នៃគន្ថីទី ៤ ត្រូវចាត់ទុកថា ក្រុមហ៊ុននោះត្រូវបានបង្កើតដោយភាគីដទៃទៀត ។ ប៉ុន្តែ ក្នុងករណីដែលក្រុមហ៊ុនពុំអាចសម្រេចគោលបំណងបានដោយសារកង្វះភាគីនោះ ត្រូវចាត់ទុកថាក្រុមហ៊ុននោះពុំត្រូវបានបង្កើតឡើយ ។
មាត្រា ៧០១. កម្មសិទ្ធិអវិភាគនៃទ្រព្យសម្បត្តិក្រុមហ៊ុន
១-ទ្រព្យធនវិនិយោគរបស់សមាជិកក្រុមហ៊ុននីមួយៗ និងទ្រព្យសម្បត្តិក្រុមហ៊ុនផ្សេងៗទៀត ត្រូវស្ថិតនៅក្រោមកម្មសិទ្ធិអវិភាគរបស់សមាជិកក្រុមហ៊ុនទាំងអស់ ។
២- សមាជិកក្រុមហ៊ុន ពុំអាចទាមទារឱ្យបែងចែកទ្រព្យសម្បត្តិក្រុមហ៊ុននៅមុនពេលធ្វើការជម្រះបញ្ជីរបស់ក្រុមហ៊ុនបានឡើយ ។ ប៉ុន្តែ ក្នុងករណីដែលសមាជិកទាំងអស់របស់ក្រុមហ៊ុនមានការព្រមព្រៀង ទោះបីជានៅមុនពេលធ្វើការជម្រះបញ្ជីក៏ដោយក៏អាចទាមទារឱ្យ បែងចែកបានដែរ ។
៣-ការបែងចែកដែលបានកំណត់ក្នុងវាក្យខណ្ឌទី ២ នៃកថាខណ្ឌទី ២ ខាងលើនេះពុំអាចយកមកតតាំងចំពោះតតិយជន ដែលបានធ្វើជំនួញជាមួយនឹងក្រុមហ៊ុននៅមុនពេលធ្វើការបែងចែកនោះបានឡើយ ។
៤-សមាជិកក្រុមហ៊ុនពុំអាចចាត់ចែងភាគ ដែលខ្លួនមានចំពោះទ្រព្យសម្បត្តិក្រុមហ៊ុននោះបានឡើយ ។
មាត្រា ៧០២. វិធីអនុវត្តកិច្ចការ
១-ក្នុងករណីដែលពុំបានកំណត់សមាជិកក្រុមហ៊ុន ឬតតិយជនទទួលអាណត្តិអនុវត្តកិច្ចការនៅក្នុងកិច្ចសន្យាក្រុមហ៊ុនទេសមាជិកនីមួយៗ នៃក្រុមហ៊ុនមានសិទ្ធិអំណាចអនុវត្តកិច្ចការរបស់ក្រុមហ៊ុននោះ ។ ប៉ុន្តែ ការអនុវត្តកិច្ចការក្រុមហ៊ុនត្រូវសម្រេចដោយសម្លេងលើសពីពាក់កណ្តោលនៃចំនួនសមាជិកនោះ ។
២-ប្រសិនបើបានកំណត់ថាសមាជិកក្រុមហ៊ុន ឬតតិយជនដែលទទួលអាណត្តិអនុវត្តកិច្ចការនៅក្នុងកិច្ចសន្យាក្រុមហ៊ុន ត្រូវមានច្រើននាក់ការអនុវត្តកិច្ចការក្រុមហ៊ុនត្រូវសម្រេចដោយសម្លេងលើសពីពាក់កណ្តាលនៃចំនួនសមាជិកនោះ ។
៣-ទោះបីមានបញ្ញត្តិនៅក្នុងកថាខណ្ឌទី១ និងទី២ ខាងលើនេះក៏ដោយសមាជិកក្រុមហ៊ុននីមួយៗ ឬអ្នកអនុវត្តកិច្ចការម្នាក់ៗអាចអនុវត្តកិច្ចការប្រក្រតីរបស់ក្រុមហ៊ុនដោយឯកតោភាគីបាន ។ ប៉ុន្តែ បញ្ញត្តិនេះមិនត្រូវយកមកអនុវត្តឡើយ ប្រសិនបើសមាជិកនៃក្រុមហ៊ុន ឬអ្នកអនុវត្តកិច្ចការផ្សេងទៀត បានបញ្ចេញមតិតវ៉ានៅមុនពេលបញ្ចប់កិច្ចការនោះ ។
មាត្រា ៧០៣. ការយកបញ្ញត្តិនៃអាណត្តិមកអនុវត្តដូចគ្នា
បញ្ញត្តិចាប់ពីមាត្រា ៦៤០ (ករណីយកិច្ចប្រុងប្រយ័ត្នរបស់អាណត្តិគាហក) រហូតដល់មាត្រា ៦៤៦ (សិទ្ធិទាមទារឱ្យ សងមកវិញ ជាអាទិ៍ នូវសោហ៊ុយរបស់អាណត្តិគាហក) នៃក្រមនេះត្រូវយកមកអនុវត្តដូចគ្នាផងដែរ ចំពោះសមាជិកក្រុមហ៊ុនដែលអនុវត្តកិច្ចការរបស់ក្រុមហ៊ុន ។
មាត្រា ៧០៤. ការលាឈប់ និងការបញ្ឈប់សមាជិកក្រុមហ៊ុនដែលអនុវត្តកិច្ចការ
១-ប្រសិនបើគ្មានមូលហេតុត្រឹមត្រូវទេ សមាជិកក្រុមហ៊ុនដែលអនុវត្តកិច្ចការពុំអាចលាឈប់ ឬត្រូវបញ្ឈប់បានឡើយ ។
២-ដើម្បីបញ្ឈប់សមាជិកដែលអនុវត្តកិច្ចការរបស់ក្រុមហ៊ុន ដោយមានមូលហេតុត្រឹមត្រូវ ត្រូវមានសម្លេងយល់ព្រមលើសពីពាក់កណ្តោលនៃចំនួនសមាជិកផ្សេងទៀតរបស់ក្រុមហ៊ុន ។
មាត្រា ៧០៥. សិទ្ធិធ្វើការស្រាវជ្រាវលើកិច្ចការ និងស្ថានភាពទ្រព្យសម្បត្តិ
ទោះបីជាគ្មានសិទ្ធិអំណាចក្នុងការអនុវត្តកិច្ចការរបស់ក្រុមហ៊ុនក៏ដោយ ក៏សមាជិកនីមួយៗរបស់ក្រុមហ៊ុនអាចធ្វើការស្រាវជ្រាវលើកិច្ចការ និងស្ថានភាពទ្រព្យសម្បត្តិរបស់ ក្រុមហ៊ុននោះបានដែរ ។
មាត្រា ៧០៦. សិទ្ធិទាមទារចែកចំណេញ ភាគនៃការបែងចែកការចំណេញខាត
១-សមាជិកក្រុមហ៊ុន ត្រូវគណនាការចំណេញខាតនៅក្នុងអំឡុងពេលទៀងទាត់ ហើយក្នុងករណីដែលមានចំណេញអាចទាមទារឱ្យបែងចែកផលចំណេញនោះបាន ។
២-ប្រសិនបើសមាជិកក្រុមហ៊ុន មិនបានកំណត់ភាគនៃការបែងចែកការចំណេញខាតទេត្រូវកំណត់ទៅតាមសមាមាត្រនៃចំនួនតម្លៃវិនិយោគទ្រព្យធនរបស់សមាជិកនីមួយៗនៃក្រុមហ៊ុននោះ ។
៣-ប្រសិនបើបានកំណត់តែភាគនៃការបែងចែកចំពោះការចំណេញ ខាតណាមួយត្រូវសន្មតថាភាគនោះដូចគ្នាទៅនឹងការខាតបង់ និងការចំណេញ ។
មាត្រា ៧០៧. ភាគដែលត្រូវទទួលបន្ទុកនៃការខាតបង់របស់សមាជិកក្រុមហ៊ុនចំពោះម្ចាស់បំណុល
១-កាតព្វកិច្ចដែលកើតឡើង ដោយកិច្ចការរបស់ក្រុមហ៊ុនជាកាតព្វកិច្ចដោយសាមគ្គីភាព។ ប៉ុន្តែ កាតព្វកិច្ចនោះត្រូវសងដោយទ្រព្យសម្បត្តិក្រុមហ៊ុនសិន ហើយប្រសិនបើមិនអាចសងកាតព្វកិច្ចទាំងអស់ដោយទ្រព្យសម្បត្តិក្រុមហ៊ុនទើបសងដោយ ទ្រព្យដោយឡែករបស់សមាជិកនីមួយៗ ។
២-បន្ទុករបស់សមាជិកនីមួយៗ ត្រូវអនុលោមតាមសមាមាត្រនៃភាគវិនិយោគលើកលែងតែមានការសន្យាពិសេស ។
មាត្រា ៧០៨. ការហាមឃាត់មិនឱ្យទូទាត់កាតព្វកិច្ចក្រុមហ៊ុន
កូនបំណុលរបស់ក្រុមហ៊ុន ពុំអាចទូទាត់កាតព្វកិច្ចនោះជាមួយនឹងសិទ្ធិលើបំណុល ចំពោះសមាជិកនីមួយៗនៃក្រុមហ៊ុនបានឡើយ ។
មាត្រា ៧០៩. ការដកខ្លួនដោយស្ម័គ្រចិត្ត
១-ប្រសិនបើពុំបានកំណត់អំឡុងពេលនៃអត្ថិភាពរបស់ក្រុមហ៊ុននៅក្នុងកិច្ចសន្យាក្រុមហ៊ុនទេ ឬបើបានកំណត់អត្ថិភាពដែលក្រុមហ៊ុនត្រូវមានក្នុងរយៈពេលមួយជីវិតរបស់សមាជិកណាម្នាក់សមាជិកនីមួយៗ អាចដកខ្លួនចេញនៅពេលណាក៏បាន ។ ប៉ុន្តែ ការដកខ្លួននេះពុំអាចធ្វើបានឡើយបើបណ្ដាលឱ្យខូចផលប្រយោជន៍ដល់ក្រុមហ៊ុន លើកលែងតែក្នុងករណីដែលពុំអាចជៀសវាងបាន ។
២-ទោះបីជាបានកំណត់អំឡុងពេលនៃអត្ថិភាព របស់ក្រុមហ៊ុនក៏ដោយនៅក្នុងករណី ដែលពុំអាចជៀសវាងបានសមាជិកនីមួយៗអាចដកខ្លួនបាន ។
៣-ការដកខ្លួនអាចធ្វើទៅបានដោយការបង្ហាញឆន្ទៈ ចំពោះសមាជិកផ្សេងទៀតទាំងអស់របស់ក្រុមហ៊ុន ។
មាត្រា ៧១0. ការដកខ្លួនតាមច្បាប់
ក្រៅពីបញ្ញត្តិដែលបានកំណត់នៅក្នុងមាត្រា៧០៩ (ការដកខ្លួនដោយស្ម័គ្រចិត្ត) ខាងលើសមាជិកក្រុមហ៊ុនត្រូវដកខ្លួនដោយមូលហេតុណាមួយដូចខាងក្រោមនេះ :
ក-មរណភាព ។
ខ-ធនក្ស័យ ។
គ-បានទទួលការប្រកាសចាប់ផ្តើមអាណាព្យាបាលទូទៅ ។
ឃ-ការលុបឈ្មោះ ។
មាត្រា ៧១១. ការលុបឈ្មោះ
ការលុបឈ្មោះសមាជិកក្រុមហ៊ុនអាចអនុវត្តបានដោយមតិយល់ព្រមជាឯកច្ឆន្ទពីសមា
ជិកផ្សេងទៀតទាំងអស់របស់ក្រុមហ៊ុនតែក្នុងករណីដែលមានមូលហេតុត្រឹមត្រូវប៉ុណ្ណោះ។ ប៉ុន្តែ បើមិនបានជូនដំណឹងពីការលុបឈ្មោះដល់សមាជិកក្រុមហ៊ុនដែលត្រូវបានលុបឈ្មោះទេពុំអាចយកទៅតតាំងជាមួយនឹងសមាជិកក្រុមហ៊ុន ដែលត្រូវបានលុបឈ្មោះនោះបានឡើយ ។
មាត្រា ៧១២. ការសងវិញនូវចំណែករបស់សមាជិកក្រុមហ៊ុនដែលដកខ្លួន
១-ការគណនារវាងសមាជិកក្រុមហ៊ុនដែលបានដកខ្លួន និងសមាជិកផ្សេងទៀតរបស់ក្រុមហ៊ុនចាំបាច់ត្រូវអនុវត្តដោយផ្អែកតាមស្ថានភាពនៃទ្រព្យសម្បត្តិរបស់ក្រុមហ៊ុន នៅពេលដែលដកខ្លួននោះ ។
២-ចំណែកដែលសមាជិកក្រុមហ៊ុន ដែលបានដកខ្លួននោះមានអាចសងវិញជាប្រាក់ បានដោយពុំគិតពីប្រភេទនៃទ្រព្យធនដែលវិនិយោគនោះឡើយ ។
៣-ចំពោះចំណុចដែលពុំទាន់បានបញ្ចប់ នៅពេលដកខ្លួនអាចគណនាបាននៅក្រោយពេលធ្វើការបញ្ចប់នោះ ។
៤-ការសងចំណែកដែលមានទៅសមាជិកក្រុមហ៊ុនដែលត្រូវបានលុបឈ្មោះ ត្រូវភ្ជាប់ការប្រាក់តាមអត្រាការប្រាក់ដែលកំណត់ដោយច្បាប់ ចំពោះអំឡុងពេលគិតចាប់ពីពេលដែលបានជូនដំណឹងអំពីការលុបឈ្មោះ រហូតដល់ពេលដែលបានសងវិញ ។
មាត្រា ៧១៣. ការរំលាយក្រុមហ៊ុន
១-ក្រុមហ៊ុន ត្រូវរំលាយតាមករណីណាមួយ ដូចកំណត់ខាងក្រោមនេះ :
ក-ការបញ្ចប់កិច្ចការដែលជាកម្មវត្ថុរបស់ក្រុមហ៊ុន ឬអលទ្ធភាពក្នុងការបំពេញកិច្ចការនោះ ។
ខ-បើមានការព្រមព្រៀងពីសមាជិកទាំងអស់របស់ក្រុមហ៊ុន ។
គ-បើនៅសល់សមាជិកក្រុមហ៊ុន តែម្នាក់ ។
ឃ-បើអំឡុងពេលនៃអត្ថិភាពរបស់ក្រុមហ៊ុន ដែលកំណត់នៅក្នុងកិច្ចសន្យា ក្រុមហ៊ុនត្រូវបានបញ្ចប់ ។
២-ក្នុងករណីដែលមានមូលហេតុមិនអាចជៀសវាង បានសមាជិកនីមួយៗរបស់ក្រុមហ៊ុនអាចទាមទារឱ្យរំលាយក្រុមហ៊ុនបាន ។
៣-ការទាមទារនៃកថាខណ្ឌទី ២ ខាងលើនេះ ត្រូវធ្វើដោយការបង្ហាញឆន្ទៈចំពោះ សមាជិកផ្សេងទៀតទាំងអស់របស់ក្រុមហ៊ុន ។
មាត្រា ៧១៤. ភាពគ្មានប្រតិសកម្មនៃការរំលាយ
ការរំលាយក្រុមហ៊ុន ពុំមានអានុភាពប្រតិសកម្មឡើយ ។
មាត្រា ៧១៥. អ្នកជម្រះបញ្ជី
១-ប្រសិនបើក្រុមហ៊ុនត្រូវបានរំលាយការជម្រះបញ្ជីត្រូវធ្វើដោយសហការគ្នារវាងសមា
ជិកទាំងអស់របស់ក្រុមហ៊ុន ឬដោយអ្នកជម្រះបញ្ជី ដែលត្រូវបានជ្រើសតាំងដោយសមាជិកក្រុមហ៊ុន ។
២-ការជ្រើសតាំងអ្នកជបញ្ជីនៃកថាខណ្ឌទី ១ ខាងលើនេះ ក្នុងករណីដែលគ្មានកំណត់ពិសេសនៅក្នុងកិច្ចសន្យាក្រុមហ៊ុនទេ ត្រូវសម្រេចដោយសម្លេងលើសពីពាក់កណ្តាលនៃចំនួនសមាជិកក្រុមហ៊ុននោះ ។
មាត្រា ៧១៦. ការអនុវត្តកិច្ចការរបស់អ្នកជម្រះបញ្ជី
បញ្ញត្តិនៃមាត្រា ៧០២ (វិធីអនុវត្តកិច្ចការ) នៃក្រមនេះត្រូវយកមកអនុវត្តដូចគ្នាផងដែរ ក្នុងករណីដែលអ្នកជម្រះបញ្ជីមានចំនួនច្រើននាក់ ។
មាត្រា ៧១៧. ការលាឈប់ និងការបញ្ឈប់អ្នកជម្រះបញ្ជី
បញ្ញត្តិនៃមាត្រា ៧០៤ (ការលាឈប់ និងការបញ្ឈប់សមាជិកក្រុមហ៊ុនដែលអនុវត្តកិច្ចការ) នៃក្រមនេះ ត្រូវយកមកអនុវត្តដូចគ្នាផងដែរក្នុងករណីដែលសមាជិកទាំងអស់របស់ក្រុមហ៊ុន បានព្រមព្រៀងជ្រើសតាំងអ្នកជម្រះបញ្ជីពីក្នុងចំណោមសមាជិកក្រុមហ៊ុននោះ ។
មាត្រា ៧១៨. មុខងារ និងសិទ្ធិអំណាចរបស់អ្នកជម្រះបញ្ជីវិធីបែងចែកទ្រព្យសម្បត្តិដែលនៅសេសសល់
១-បញ្ញត្តិនៃមាត្រា ៧១ (មុខងារ និងសិទ្ធិអំណាចរបស់អ្នកជម្រះបញ្ជី) នៃក្រមនេះត្រូវយកមកអនុវត្តដូចគ្នាផងដែរចំពោះមុខនាទី និងសិទ្ធិអំណាចរបស់អ្នកជម្រះបញ្ជី ។
២-ទ្រព្យសម្បត្តិដែលនៅសេសសល់ត្រូវបែងចែកដោយសមាមាត្រតាមតម្លៃនៃ ទ្រព្យធនដែលសមាជិកនីមួយៗរបស់ក្រុមហ៊ុន បានវិនិយោគ ។
Lawkh 