ទាយក (donor) សំដៅដល់ភាគីម្ខាងនៃកិច្ចសន្យាប្រទានកម្ម ដែលបង្ហាញឆន្ទៈផ្តល់ទៅឱ្យភាគីម្ខាងទៀតនូវទ្រព្យសម្បត្តិ ដោយមិនយកថ្លៃ។
ប្រភព: សទ្ទានុក្រមពាក្យច្បាប់ ខ្មែរ អង់គ្លេស បារាំង ផ្នែករដ្ឋប្បវេណី និងនីតិវិធីរដ្ឋប្បវេណី រៀបចំដោយគណៈកម្មការបណ្ឌិត្យសភាទទួលបន្ទកអនុម័តពាក្យច្បាប់ របស់ទីស្តីការគណៈរដ្ឋមន្រ្តីបោះពុម្ពលើកទី១ ឆ្នាំ ២០០៧។
✍សម្រង់មាត្រានៃក្រមរដ្ឋប្បវេណី៖
មាត្រា ៥៧១. ការលុបចោលប្រទានកម្មដោយសារអំពើរំលោភលើទំនុកចិត្ត ជាអាទិ៍
១-ក្នុងករណីដែលបដិគ្គាហកបានធ្វើអំពើរំលោភលើទំនុកចិត្តធ្ងន់ធ្ងរចំពោះទាយក ទាយកអាចលុបចោលប្រទានកម្ម បាន។
២-ចំពោះផ្នែកដែលបានអនុវត្តហើយ ការលុបចោលប្រទានកម្មដែលកំណត់នៅក្នុងកថាខណ្ឌទី ១ ខាងលើនេះអាចធ្វើបានតែក្នុងអំឡុងពេល ៥ (ប្រាំ) ឆ្នាំ គិតចាប់ពីពេលដែលមានអំពើរំលោភលើទំនុកចិត្តធ្ងន់ធ្ងរនោះ។
មាត្រា ៥៧២. ការលុបចោលប្រទានកម្មដោយសារភាពទីទ័លក្ររបស់ទាយក
១-ប្រសិនបើទាយកធ្លាក់ខ្លួនក្នុងស្ថានភាពទីទ័លក្រ មិនអាចរក្សាជីវភាពរស់នៅរបស់ខ្លួនផ្ទាល់ និងបុគ្គលដែលត្រូវមានអាហារកាតព្វកិច្ចក្រោយពីបានបង្ហាញឆន្ទៈធ្វើប្រទានកម្មហើយ ទាយក អាចលុបប្រទានកម្មនោះចោលបាន ។
២-ចំពោះផ្នែកដែលបានអនុវត្តហើយ ការលុបចោលប្រទានកម្មដែលកំណត់នៅក្នុងកថាខណ្ឌទី ១ ខាងលើនេះអាចធ្វើបានតែក្នុងអំឡុងពេល ៥ (ប្រាំ) ឆ្នាំ គិតចាប់ពីពេលដែលបានអនុវត្ត។
មាត្រា ៥៧៣. អានុភាពនៃការលុបចោលប្រទានកម្ម
ក្នុងករណីដែលបានលុបចោលប្រទានកម្មតាមបញ្ញត្តិនៃមាត្រា ៥៧១ (ការលុបចោលប្រទានកម្មដោយសារអំពើរំលោភលើទំនុកចិត្ត ជាអាទិ៍) និងមាត្រា ៥៧២ (ការលុបចោលប្រទានកម្មដោយសារភាពទីទ័លក្ររបស់ទាយក) ខាងលើនេះទាយកអាចទាមទារឱ្យសងទ្រព្យសម្បត្តិដែលបានធ្វើប្រទានកម្មនោះដោយផ្អែកតាមបញ្ញត្តិស្តីពីការសងនៃសេចក្តីចម្រើនដោយឥតហេតុបាន ។
មាត្រា ៥៧៤. ការបន្ថយនូវការទទួលខុសត្រូវក្នុងការធានា
ទាយកពុំមានបន្ទុកទទួលខុសត្រូវក្នុងការធានាចំពោះវិការៈ ឬការខ្វះវត្ថុ ឬសិទ្ធិដែលជាកម្មវត្ថុនៃប្រទានកម្មឡើយ។ ប៉ុន្តែ បញ្ញត្តិនេះមិនត្រូវយកមកអនុវត្តឡើយបើទាយកបានដឹងអំពីវិការៈ ឬការខ្វះនោះហើយតែមិនបានផ្តល់ដំណឹងទៅបដិគ្គាហក។
មាត្រា៥៧៥. ប្រទានកម្មដោយមានកំណត់ពេល
ប្រទានកម្ម ដែលធ្វើឡើងក្នុងគោលបំណងផ្តល់តាវកាលិកដោយមានកំណត់ពេលត្រូវបាត់បង់អានុភាពដោយមរណភាពរបស់ទាយកឬបដិគ្គាហក។
មាត្រា ៥៧៦. ប្រទានកម្មដែលមានភ្ជាប់បន្ទុក
១-ប្រទានកម្ម ដែលបដិគ្គាហកមានករណីយកិច្ចត្រូវអនុវត្តការផ្តល់តាវកាលិកជា កំណត់ដើម្បីទទួលទ្រព្យសម្បត្តិដែលជាកម្មវត្ថុនៃប្រទានកម្មត្រូវហៅថា ប្រទានកម្មដែល មានភ្ជាប់បន្ទុក ។
២-នៅក្នុងប្រទានកម្ម ដែលមានភ្ជាប់បន្ទុកទាយកត្រូវទទួលខុសត្រូវលើប្រាតិភោគដូចគ្នានឹងអ្នកលក់ផងដែរត្រឹមកម្រិតនៃបន្ទុកនោះ។
៣-ក្នុងករណី ដែលភាគីម្ខាងបានធ្វើការផ្តល់តាវកាលិកនៅក្នុងប្រទានកម្មដែលមានភ្ជាប់បន្ទុក បុគ្គលនោះអាចទាមទារចំពោះភាគីម្ខាងទៀតឱ្យផ្តល់តាវកាលិកបាន ។
៤-នៅក្នុងប្រទានកម្ម ដែលមានភ្ជាប់បន្ទុកបើគ្មានកិច្ចសន្យាពិសេសទេលុះត្រាតែភាគីម្ខាងមិនបានធ្វើការផ្តល់តាវកាលិកទេទើបភាគីម្ខាងទៀតនៃកិច្ចសន្យាអាចមិនផ្តល់តាវកាលិករបស់ខ្លួនបាន។
៥-ទាយកនៃប្រទានកម្មដែលមានភ្ជាប់បន្ទុក អាចរំលាយកិច្ចសន្យាប្រទានកម្មដែលមានភ្ជាប់បន្ទុកនោះតាមបញ្ញត្តិនៃការរំលាយកិច្ចសន្យាបាននៅក្នុងករណី ដែលភាគីម្ខាងទៀតមិនបានអនុវត្តបន្ទុក។
មាត្រា ៥៧៧. ប្រទានកម្មដោយមូលហេតុមរណភាព
១-ប្រទានកម្មដែលបង្កើតអានុភាពដោយមរណភាពរបស់ទាយកត្រូវហៅថា ប្រទានកម្មដោយមូលហេតុមរណភាព។
២-បញ្ញត្តិនៃអច្ច័យទានត្រូវយកមកអនុវត្តដូចគ្នាផងដែរចំពោះអានុភាពនៃ ប្រទានកម្មដោយមូលហេតុមរណភាព។
Lawkh 